فضيحة مور فضيحة و شكون يحد الباس ، نعم فضيحة ديال حزب العدالة و التنمية بفاس اللي من خلالو قالك أ سيدي باللي العمدة الإدريسي الأزمي غادي يقدم الحصيلة ديال منجزات مدينة فاس على مرور ثلاث سنوات من ظفره برئاسة مجلس جماعة فاس . المشكل ماشي هو هذا واخة كنتسناو بفارغ الصبر شنو هي هاد الحصيلة اللي دار المجلس الحالي المشكل و لا الفضيحة اللي قلنا هي أن السي الأزمي غادي يقدم الحصيلة د مجلس جماعة مدينة بأكملها في مقر ديال حزب العدالة و التنمية اللي كيتواجد بالقرب من مسجد التجموعتي وسط فاس . و كاتب في لافيش ديال الدعوة للحضور إلى اللقاء التواصلي أن الدعوة ليست للعموم لكنها خاصة لأعضاء حزب العدالة و التنمية .
واش كاين كثر من هاد الشوهة ؟ واش هادي هي الديمقراطية اللي كايهضر عليها الدستور و كاتهضر عليها خطابات جلالة الملك و اللي كايحث على التواصل ؟ واش هكذا المواطن أ يوصل للمعلومة ؟
نعث الناس اللي كايدافعوا على مدينة فاس و ينتاقذوا سوء التدبير و التسيير بالمشوشين و الكتابة الإقليمية ديالو صدرت بلاغ و قالت باللي صحف صفراء و أقلام مأجورة ، و كلشي دوزها و دازت و كلشي كايتسنى 2021 و يرد حساب النصب اللي نصب عليه العدالة و التنمية في الحملة الانتخابية اللي رفع فيها شعار فاس…تستحق الأفضل .
و لكن باش ا السي الأزمي دير يوم تواصلي تقدم فيه الحصيلة د فاس غير مع أعضاء الحزب ديالك ما عندها حتى معنى ، إذا نقهموا باللي التسيير ديالكم غير بيناتكم و هي اللي سبق و قلنا أن اللي تابعلكم كاتهلاو فيه و ديرولو الحساب و اللي قال باللي كاتخربقوا حتى هو كاتخربقوه إذا ما كذبناش فكل كلمة قلناها و كتبناها . عادي توجهوا الدعوة غير اللي منتميين ليكم حيث عندكم المرتزقة و عندكم لحاسين الكابة و عندكم اللي كايقولو غذا العيد و عندكم الجرائد الزرقاء ماشي الصفراء اللي تنشر الفضائح و المكبوتات دبالها و ما تقدرش تنتاقذ مجلسكم و مقاطعاتكم حيث منين طلعتوا عاد ولات هاذ الجرائد كادبر على راسها و عندكم المناضلات العفيفات الشريفات و هندكم القواعد ديالكم من البلطجيين و عندكم اللي يطبل و يهلل و يقولكم الشريف مولاي ادريس غير نساو يزيدو مولاي ادريس الثالث .
كإعلام حر و نزيه و كفعاليات جمعوية نتبرأ من هذه الحصيلة التي ستقدمها لأعضائك أ السي الأزمي و كيف ما ما كنقدروش نعتوك بشفار حيث بصح انت ماشي شفار و هذه شهادة نقدمها لك .ما تخليناش تقولو عليك كذاب و كما تكذبش على أعضائك و يخرجو يفرعوا لينا الراس بتدوينات فارغة و حامضة و يشكروك و يمجدو فيك حيث غادي نعطيوك العصير صوت و صورة انت و إنجازاتك.
كانعقلوا على أيام شباط و فاش كان حزب الاستقلال استقلال ، و بغى يقدم الحصيلة د المجلس ديالو و حتى إلى كان بغى يهضر على الحصيلة جات معاه سوق لفاس من خلال النافورات و الطرقات و الإضاءة و مطرح النفايات و زيد و زيد و كنا معارضين لتبدير الأموال و انتقذناه في عدة مقالات و فيديوهات و فاش بغى يقدم الحصيلة ديالو لم يستثني أحدا و منهم مستشارون اليوم محسوبين عليك و معاك و كاين دلائل أنهم كانوا حاضرين كايتفرجوا في “داطاشو” و حميد شباط كايقدم المنجزات في معهد الفنون الجميلة بطريق عين الشقف ما اختارش مقر حزب الاستقلال يدير فيه اليوم التواصلي حيث كايهم مدينة فاس و كلشي عندو الحق يحضر و يسمع و يشوف واش كان كايكذب و لا لا .
غادي تهضر على أوزون ؟ على سيتي باص ؟ على المساحات الخضراء ؟ غادي تهضر على مطرح النفايات ؟ على الكريديات اللي كتسال لفاس ؟ غادي تهضر على مافيات العقار ؟ شنو آخور هادشي اللي فجدهكم تقدروا تهضروا عليه .
علاش ما تقدرش تهضر على الاستشمار و المستثمرين و تقول أننا فشلنا نقدموا أوعية عقارية ، ما غاديش تقدر تهضر على تفاقم الباعة المتجولين و احتلال الملك العام بالدوبل في عهدكم ، ما غاديش تقدر تهضر على الكلينيك د خو الحارثي اللي وجدتولو الرصيف بالزليج و أعمدة الإنارة قبل ما يتبنى ، ما غاديش تقدر تهضر على المدارس و الرخص اللي كايوجد العبدلاوي استعدادا للرحيل ديالو، ما عندكش الجرأة تهضر على سوق الجملة لاكريي اللي واعدتو تغطيوه و تعطيوه لمواليه في 1 شتنبر و ما كاين والو ، ما غاديش تقدر تهضر على سوق السمك و الاختلالات اللي فيه . ما غاديش تقدر تهضر و تقول باللي الإنارة في فاس تراجعت و برمنا صفقات كانخربقوا فيها مع العمران و دابا الحقيقة24 تقولك التخربيق ديال الصفقة فين كاين هو و الصفقة ديال حاويات الأزبال د أوزون تحت الأرض .
و أخيرا فهمنا باللي مجلس جماعة فاس يدبر شؤون المدينة على أساس أن الأزمي رئيس جمعية و فاس هي مقر الجمعية و الأعضاء د الجمعية هم الموالين لحزب البيجيدي و الساكنة غير زايدين حيث ما كاينينش في المكتب المسير لجمعية الشريف الدكتور الأستاذ العالم العمدة مولاي ادريس الثالث زعما مولاي ادريس الادريسي الإزمي .
