بعدما نشرت جريدة الحقيقة 24 مقالها عن ماضي الرئيس الحالي لجماعة عين البيضاء قبل تحمله المسؤولية وربطته بالحاضر أي بعدما أصبح شخصية عمومية وتسلم رئاسة واحدة من أغنى الجماعات القروية تفاجأنا ببيان من خمسة عشر سطرا صادرا وموقعا من طرف تحالف من تسعة وعشرين شخصا سمو أنفسهم أعضاء المجلس الجماعي لعين البيضاء بكل مكوناته ودون استثناء، وكذا رؤساء الجمعيات والتعاونيات وكل فعاليات المجتمع المدني بجميع تراب الجماعة.
لقد استطاعت جريدة الحقيقة 24 أن تطير النوم من عيني الرئيس وتزرع في قلبه الرعب بمقال واحد.
الرئيس موالف غي على اللي كيلحسو ليه الكابة وعلى اللي كيقدمو ليه آيات الولاء والإخلاص واللي يزوق وينفخ ليه “فالمنجزات التاريخية اللي قدم للساكنة”
أولا شكون اللي وقع معك؟ أعضاء المجلس الجماعي ديال عين البيضاء اللي أنت هو الرئيس المباشر ديالهم.
وشكون يشهد لك يا العروس؟ خالتي وجارتي والقاعدة قبالتي.
أنا كنعذر أعضاء المجلس الجماعي ديال عين البيضاء اللي وقعوا على البيان وخا ماقراوهش. طرف دالخبز صعيب والوقت مكترحمش والإمتيازات غي الأحمق هو اللي كيرفضها خصوصا رؤساء اللجان الدائمة واللي يدو فالكاميلة. والفاهم يفهم
آجيوا السادة رؤساء الجمعيات والتعاونيات اللي موقعين فالبيان، واش فراس أعضاء الجمعيات ديالكم هاد الخطوة اللي درتو ديال توقيع البيان والدخول كطرف ثالث فنزاع بعيد عليكم؟ واش درتو اجتماع قبلي تدارستو فيه هاد البيان. الجريدة ماهضراتش عليكم لامن قريب ولا من بعيد.
آه ريحة الدعم كتعطي و خفتتوا تقطع عليكم البزولة . ايوا قولوها لينا. المهم. هذا بيان خاوي وكلو سب وقذف واتهامات وماغادي يهز فينا شعرة. وسنواصل طرح الأسئلة اللي مكيقدروش يطرحوها عليك الآخرين.
التعويضات على رئاسة الجماعة محددة ف 3000 درهم شهريا. ويلا عند السيد الرئيس شي مدخول آخر يبينو للرأي العام. حنا غنديرو معك حساب العجائز و غانساءلوا المجلس الجهوي للحسابات و النيابة العامة عن التصريح بممتلاكتك قبل و بعد ما تولي رئيس أ السي الهرد .
الفيرمات و الكاط كاط الله يزيد ويكمل. والفيلا والوليدات كيقراو فالمدارس الخاصة واش هاد الشي كتديرو 3000 درهم تعويضات رئاسة الجماعة بوحدها؟.
حنا السيد الرئيس مكندخلوش معه فحياتو الخاصة. لكنه بمجرد ما تحمل المسؤولية ولى شخصية عمومية ومن حقنا نسولوه شنو المنجزات اللي دار للسكان.
المهم هادي غي البداية وتسنانا هاحنا جايين لك بما يفيد و جيش اللي بغيتي كرشنا خاوية كجريدة فضحت الفساد ديال بزاف .
