محمد الحجيرة، النائب البرلماني عن حزب الأصالة والمعاصرة ورئيس جماعة تمزكانة بتاونات، متهم باستغلال قبة البرلمان للدفاع على مشروع استثماري خاص بيه على أرض الدولة و بتمويل من وكالة التنمية الفلاحية ، فعوض ما يهضر على مشاكل الساكنة اللي صوتات عليه جاي كايهضر على حاجة كاتخصو .
هادشي كامل داز فاش كان وزير الفلاحة حاضر فجلسة عمومية، استغل البرلماني الحجيرة الفرصة وطلب منو يرجع ليه ضمانة مالية مرتبطة بمشروع ماكملوش، رغم أنه ماحترمش دفتر التحملات، والمشروع باقي ما بان ليه أثر فالأرض.
هاد التصرف اعتبراتو مصادر برلمانية تجاوز خطير وخرق لقواعد المؤسسة التشريعية، ودابا كاينة تحركات باش يتم تفعيل القانون الداخلي ديال البرلمان فحقو، وهادشي كيرجع لوجود تضارب مصالح خطير.
المواطنين كيسولو: واش هاد البرلمانيين كيمثلو الشعب ولا كيدافعو على مشاريعهم الشخصية؟
