واش كاين شي شوهة أكثر من هادي؟ وسط مدينة فاس، العاصمة العلمية للمملكة، المشهد ولى كيحزّ في النفس: ركام بنايات مهملة، وأزبال متناثرة، وشارع مقطوع بلا سبب واضح، وكل هاد الفوضى كاينة قدّام عيون السلطات المحلية ومجلس مقاطعة أكدال!
ساكنة المنطقة عبّرات في تصريحات لـ”الحقيقة24″ عن سخطها الكبير من الوضع اللي ولى كيقلّب ملامح المدينة ويشوه صورتها الحضارية. فبدل مشاريع التهيئة اللي كانت كتمنّاها الساكنة، ولات كتشوف مشاهد الخراب والإهمال كل صباح.
وحسب ما وثقته عدسة الحقيقة24 ، فإن هذه الفوضى بمحيط المنطقة الامنية الثانية و بريد المغرب مجاورة لاتصالات المغرب على مستوى وسط فاس التي تحولت لمزبلة عشوائية لركام بناية او بنايات في طور الإصلاح.
والسؤال المطروح اليوم بقوة: فين هو مجلس مقاطعة أكدال؟ وفين هي السلطات المحلية؟ واش معقول تبقى فوضى بحال هادي وسط مدينة بحجم فاس بلا تحريك ساكن؟
اللي كيزيد الطين بلّة، هو أن هاد المنظر المشين كيعطي صورة سوداوية للزوار والسياح، خصوصاً وأن فاس كتُقدَّم دائماً كواجهة حضارية وتاريخية للمغرب.
السكان كيطالبو بتدخل عاجل من والي جهة فاس مكناس السيد خالد آيت الطالب لوضع حد لهاذ الفوضى وتنظيف المكان وإرجاع الأمور لنصابها، لأن الصمت على هاد المنظر العيب ما بقاش مقبول.
